"Ju flet radio Kyiv-Prishtina"

Sot nga ora 17:00 e tutje, live ose nga arkiva, mund ta përcjellni një edicion të veçantë të Montez Press Radio, me një urë që lidh kryeqytetet kaltër-verdhë të Kosovës dhe Ukrainës.

Montez Press Radio është një platformë eksperimentale e radios dhe performimit. Janë prezentë prej 2018 me qëllimin për me nxitë më shumë eksperimentimin dhe bisedat midis artistëve, shkrimtarëve dhe mendimtarëve përmes mediumit të radios. Kjo platformë fton kënde të ndryshme të botës së artit për të ndërvepruar me njëri-tjetrin personalisht dhe në ajër – një vend ku media më në fund takohet me personin.

Në segmentin e radhës në Montez Press Radio, Rina Meta, producente kreative dhe autore nga Prishtina, takohet me Sonya Kvasha, producente dhe drejtore kreative nga Kievi.

Në një edicion special që është pjesë e festivalit FORMA, çikat me flamuj kaltër e verdhë bashkohen për të diskutuar atë që është e pashmangshme këto ditë: luftën, dhe paradoksalisht, cysh ajo mundet me formu një ndjenjë të fuqisë individuale që tejkalon atë të vendit tënd. Në këtë dialog që mbahet në Festivalin FORMA HQ në Londër, sonte bisedohet  për shoqni, muzikë, party, fotografi, girlhood edhe good vibes.